មេរៀនទី 9 — ចំណាត់ថ្នាក់មានណែនាំ៖ បង្កើតទិន្នន័យហ្វឹកហាត់

ចំណាត់ថ្នាក់មានណែនាំរៀនពីទីតាំងដែលអ្នកស្គាល់ថ្នាក់ច្បាស់ (តំបន់ហ្វឹកហាត់)។ ចាប់ពីកំណែ 2.4.0 មានវិធីពីរ៖ 🪄 ដំបងវេទមន្ត (ចុចតែម្ដង កម្មវិធីជំនួយ (Plugin) បង្កើតពហុកោណឲ្យ) ឬ គូសពហុកោណដោយដៃ។ ប្រើបន្សំប៊ែន ឬផែនទីមូលដ្ឋាន Google Satellite ដើម្បីសម្រេចចិត្តថាកន្លែងណាជាថ្នាក់អ្វី។

វិធីទី 1 — ដំបងវេទមន្ត (ចុចឲ្យរីក) · ណែនាំ

ដំបងវេទមន្តចាប់ផ្ដើមពីភីកសែលដែលអ្នកចុច ហើយរីកទៅភីកសែលជិតខាងដែល ស្រដៀងគ្នាលើប៊ែនទាំងអស់ដែលបានធីក និង នៅជាប់គ្នា។ ភីកសែលដែលខុសគ្នា (ផ្លូវ ទំនប់ ដើមឈើ) បញ្ឈប់ការរីក ដូច្នេះពហុកោណស្ថិតនៅខាងក្នុងស្រែ ស្រះ ឬព្រៃតែមួយ។ ជួរភីកសែលនៅគែមត្រូវបានកាត់ចេញ ព្រោះភីកសែលគែមច្រើនតែលាយ (ពាក់កណ្ដាលស្រែ ពាក់កណ្ដាលផ្លូវ)។

1. បើកផ្នែក មានណែនាំ — ថ្នាក់ និងទិន្នន័យហ្វឹកហាត់។ ជ្រើស រូបភាព រូបភាពផ្សំ Landsat 9 និង ប៊ែន SR_B2–SR_B7។ ប្ដូរបន្សំប៊ែនទៅ 7-5-4 (មេរៀនទី 5) ដើម្បីមើលថ្នាក់ឲ្យច្បាស់។
2. ក្នុងប្រអប់ 🪄 ដំបងវេទមន្ត (ចុចឲ្យរីក) ចុចប៊ូតុងពណ៌នៃថ្នាក់ ឧ. 1 ទឹក។ ដំបងវេទមន្តបើកដោយស្វ័យប្រវត្តិ (ប៊ូតុង ឈប់ចុច ប្ដូរជាពណ៌ក្រហម)។
3. ចុចនៅកណ្ដាលទន្លេសាប។ ពហុកោណពណ៌ទឹកលេចឡើង ហើយរបារស្ថានភាពបង្ហាញចំនួនភីកសែល និងផ្ទៃក្រឡា («ទឹក៖ … ភីកសែល (… ha)»)។ ប្រសិនបើឃើញ «ដល់ផ្ទៃអតិបរមា» មានន័យថាតំបន់ធំជាង ផ្ទៃអតិបរមាក្នុងមួយចុច ហើយត្រូវបានកាត់ត្រឹមភីកសែលដែលស្រដៀងបំផុត។ ប្រសិនបើមិនទាន់មានស្រទាប់ហ្វឹកហាត់ទេ កម្មវិធីជំនួយបង្កើត training.gpkg ក្នុងថតលទ្ធផលដោយស្វ័យប្រវត្តិ ហើយជ្រើសវាជា ស្រទាប់ហ្វឹកហាត់ និង class_id ជា វាលលេខថ្នាក់ — មិនចាំបាច់វាយលេខថ្នាក់ទេ។
4. ចុចថ្នាក់បន្ទាប់ (ឧ. 3 ស្រូវ / ដីដំណាំ) ហើយចុចនៅក្នុងស្រែច្រើនកន្លែង។ ធ្វើសម្រាប់ ថ្នាក់ទាំង 6 ចែកចាយពេញស្រុក។ បន្ទាត់ ចំនួនពហុកោណតាមថ្នាក់ រាប់ឲ្យអ្នក ដើម្បីដឹងថាថ្នាក់ណានៅខ្វះ (យ៉ាងតិច 5–10 ពហុកោណក្នុងមួយថ្នាក់)។
5. ចុចខុស? ចុច មិនធ្វើវិញ (ចុងក្រោយ)។ ចុច ឈប់ចុច ពេលបញ្ចប់ — ពហុកោណត្រូវបានរក្សាទុករួចហើយ។

ការកំណត់	លំនាំដើម	ពេលណាត្រូវប្ដូរ
កម្រិតភាពស្រដៀង	1.0	ពហុកោណរីកចូលថ្នាក់ផ្សេង → បន្ថយ (0.6–0.8)។ បានតែភីកសែលពីរបី → បង្កើន (1.2–1.5)។
ផ្ទៃអតិបរមាក្នុងមួយចុច	5 ha	ពហុកោណតូចៗច្រើនកន្លែងល្អជាងពហុកោណធំមួយ — ទុក 2–5 ha សម្រាប់ Landsat។

រូបទី 38 — គោលការណ៍ដំបងវេទមន្ត៖ ចុចមួយ (ឆ្វេង) → ពហុកោណនៃភីកសែលស្រដៀងគ្នាដែលនៅជាប់គ្នា (ស្ដាំ)៖ ទឹកទន្លេសាប (ខៀវ) ស្រែ (លឿង) និងដីទទេ (ក្រហម) លើបន្សំ 7-5-4 ស្រុកកំពង់ត្រឡាច (រូបពន្យល់ ដែលគណនាដោយក្បួនដោះស្រាយដូចគ្នាលើរូបភាពក្នុងរូបទី 40)

ដំបងវេទមន្ត ឬគូសដោយដៃ?

ដំបងវេទមន្តលឿន ហើយពហុកោណមិនដែលឆ្លងគែមស្រែ ឬទន្លេ។ ប៉ុន្តែវាមិនដឹងថាថ្នាក់ពិតជាអ្វីទេ — អ្នក ជាអ្នកសម្រេចតាមរយៈប៊ូតុងថ្នាក់។ សម្រាប់ថ្នាក់ដែលចម្រុះ (ភូមិ = ផ្ទះ + ដើមឈើ + ផ្លូវ) ការរីកឈប់លឿន ឬរីកចូលថ្នាក់ផ្សេង — គូសដោយដៃ (វិធីទី 2) ល្អជាង។ ពហុកោណទាំងពីរវិធីអាចនៅក្នុងស្រទាប់ហ្វឹកហាត់តែមួយ។

វិធីទី 2 — គូសពហុកោណដោយដៃ

1. បើកផ្នែក មានណែនាំ — ថ្នាក់ និងទិន្នន័យហ្វឹកហាត់។ ជ្រើស រូបភាព រូបភាពផ្សំ Landsat 9 និង ប៊ែន SR_B2–SR_B7។

2. ចុច បង្កើតស្រទាប់ហ្វឹកហាត់ (ពហុកោណ) ហើយរក្សាទុកជា training.gpkg ក្នុងថត RS_Lab។

   

   រូបទី 39 — រក្សាទុកស្រទាប់ហ្វឹកហាត់ជា training.gpkg

3. ស្រទាប់ តំបន់ហ្វឹកហាត់ លេចឡើងក្នុងបញ្ជីស្រទាប់ ជាមួយពណ៌នៃថ្នាក់ទាំង 6 ហើយចូលរបៀបកែសម្រួលដោយស្វ័យប្រវត្តិ។ ស្រទាប់ហ្វឹកហាត់ = តំបន់ហ្វឹកហាត់ និង វាលលេខថ្នាក់ = class_id បំពេញស្វ័យប្រវត្តិ។

4. ប្ដូរបន្សំប៊ែនទៅ 7-5-4 (មេរៀនទី 5) ដើម្បីឲ្យទឹក រុក្ខជាតិ និងដីស្ងួតខុសពណ៌គ្នាច្បាស់។ គូសពហុកោណលើផែនទី (ចុចឆ្វេងដើម្បីដាក់ចំណុច ចុចស្តាំដើម្បីបញ្ចប់) — ឧ. នៅកណ្ដាលទន្លេសាប។

   

   រូបទី 40 — គូសពហុកោណហ្វឹកហាត់ទីមួយលើទន្លេសាប (បន្សំ 7-5-4)

5. នៅប្រអប់ Feature Attributes វាយ class_id = 1 និង class_name = ទឹក រួចចុច OK។ (fid ទុក Autogenerate)

   

   រូបទី 41 — វាយ class_id 1 និង class_name ទឹក

6. ធ្វើម្ដងទៀតសម្រាប់ ថ្នាក់ទាំង 6។ គូសពហុកោណ 5–10 ក្នុងមួយថ្នាក់ ចែកចាយពេញស្រុក (ខាងលិច និងខាងកើតទន្លេ)។

7. រក្សាទុកការកែប្រែ (Save Layer Edits) ពេលបញ្ចប់។

កំហុសញឹកញាប់៖ «No training pixels found»

ប្រសិនបើ ស្រទាប់ហ្វឹកហាត់ ជាស្រទាប់តំបន់សិក្សា ហើយ វាលលេខថ្នាក់ ជា fid (រូបទី 42) កម្មវិធីជំនួយ (Plugin) មិនរកឃើញភីកសែលហ្វឹកហាត់ទេ ព្រោះតំបន់សិក្សាមិនមែនជាតំបន់ហ្វឹកហាត់ ហើយ fid មិនមែនជាលេខថ្នាក់។ ជ្រើស តំបន់ហ្វឹកហាត់ និង class_id វិញ។ ពិនិត្យផងដែរថាពហុកោណស្ថិតនៅលើរូបភាព ហើយមាន class_id ពី 1 ដល់ 6។

រូបទី 42 — កំហុស៖ ជ្រើសស្រទាប់តំបន់សិក្សា និង fid ជាទិន្នន័យហ្វឹកហាត់

គន្លឹះគូសតំបន់ហ្វឹកហាត់

• គូសនៅកណ្ដាលផ្ទៃដីដូចគ្នា ជៀសវាងគែម និងភីកសែលលាយ។
• ប្រើបន្សំប៊ែនកសិកម្ម 6-5-2 ឬ 7-5-4 ដើម្បីបំបែកស្រូវ ព្រៃ និងដីទទេងាយស្រួល។
• កុំគូសតែនៅកន្លែងតែមួយ — ស្រែខាងលិចទន្លេ និងដីលិចទឹកខាងកើតមើលទៅខុសគ្នាខ្លាំង។
• ថ្នាក់តូច (តំបន់សំណង់ ដីទទេ) ត្រូវការពហុកោណច្រើនកន្លែង — ភូមិតាមផ្លូវជាតិលេខ 5 និងទីប្រជុំជន។
• ជម្រើសផ្សេង (របៀប កម្រិតខ្ពស់)៖ ហ្វឹកហាត់ស្វ័យប្រវត្តិពី ESA WorldCover បង្កើតចំណុចហ្វឹកហាត់ដោយមិនចាំបាច់គូស (គ្រោង Auto 7)។

---

← មេរៀនទី 8 · មេរៀនទី 10 →