លំហាត់ទី៩៖ បង្កើតកំណែពណ៌ច្រើនបែបសម្រាប់របាយការណ៍

ព័ត៌មានលំហាត់

មេរៀនពាក់ព័ន្ធ៖ មេរៀនទី៩៖ ការបង្ហាញរូបភាព និងបន្សំក្រុមរលក ការអនុវត្តដោយខ្លួនឯង · QGIS 3.34 LTR · ប្រហែល ១០០ នាទី

ស្ថានភាព

របាយការណ៍របស់អ្នកត្រូវការរូបភាពបួនបែប៖ មួយសម្រាប់សាធារណជនទូទៅ និងបីសម្រាប់ការវិភាគជំនាញ។ លំហាត់នេះឱ្យអ្នកបង្កើត និងកំណត់រចនាប័ទ្មរូបភាពទាំងអស់នោះ ព្រមទាំងរក្សាទុកជា .qml សម្រាប់ប្រើឡើងវិញ។

គោលបំណង

• កំណត់ Contrast enhancement ត្រឹមត្រូវសម្រាប់បន្សំនីមួយៗ។
• បង្កើត និងប្រៀបធៀបបន្សំក្រុមរលកយ៉ាងតិចប្រាំ។
• រក្សាទុក និងអនុវត្តរចនាប័ទ្មឡើងវិញ (.qml)។
• ធ្វើផ្ទាំងប្រៀបធៀប (Print Layout) បង្ហាញបន្សំច្រើន។

លំដាប់ការងារនៃលំហាត់ទី៩ និងពេលវេលាប្រហាក់ប្រហែល។

ឯកសារដែលប្រើ

• ទិន្នន័យវគ្គ (ណែនាំ)៖ Landsat 8 ភ្នំពេញ ជាការចាំងផ្លាត TOA ពីលំហាត់ទី៧ · RS_Data.zip → L8_PhnomPenh_2019 (ឧបសម្ព័ន្ធ ខ)
• ឬរូបភាព Sentinel-2 L2A ពីលំហាត់មុន

ឈ្មោះក្រុមរលកតាមឧបករណ៍

តួនាទី	Sentinel-2	Landsat 8/9
ខៀវ · បៃតង · ក្រហម	B2 · B3 · B4	B2 · B3 · B4
NIR	B8	B5
SWIR1 · SWIR2	B11 · B12	B6 · B7

បើប្រើទិន្នន័យ Landsat 8 ភ្នំពេញ សូមប្ដូរលេខក្រុមរលកក្នុងរូបមន្ត និងបន្សំពណ៌តាមតារាងនេះ (ឧ. NDVI = (B5 − B4) / (B5 + B4))។

ពិសោធន៍មុនចាប់ផ្ដើម · ១៥ នាទី

សកម្មភាពទី១៖ បង្កើតបន្សំប្រាំ · ៤០ នាទី

សម្រាប់បន្សំនីមួយៗ បន្ថែមរូបភាពជាស្រទាប់ថ្មី កំណត់ Symbology → Multiband color និង Contrast enhancement (Cumulative ២–៩៨%)៖

#	បន្សំ (R-G-B)	ឈ្មោះស្រទាប់
១	B4-B3-B2	true_colour
២	B8-B4-B3	false_nir
៣	B11-B8-B2	agriculture
៤	B12-B11-B4	urban
៥	B4-B3-B1	bathymetric

សម្រាប់នីមួយៗ ចុចស្ដាំលើស្រទាប់ → Export → Save as QGIS Layer Style File (.qml)។

សកម្មភាពទី២៖ ប្រៀបធៀប stretch · ២០ នាទី

1. លើបន្សំ true_colour សាកល្បង stretch បួនវិធី (គ្មាន · Min-Max · Cumulative ២–៩៨% · Standard Deviation)។
2. ថតរូបអេក្រង់នីមួយៗ។ កត់ត្រាដែន Min/Max ដែល QGIS គណនា។
3. ជ្រើសវិធីមួយសម្រាប់ប្រើក្នុងរបាយការណ៍ចុងក្រោយ ព្រមហេតុផល។

សកម្មភាពទី៣៖ ប្រៀបធៀបស៊ីគ្នារវាងស្រទាប់ · ១៥ នាទី

1. ជ្រើសពីរស្រទាប់ណាមួយ (ឧ. true_colour ថតឆ្នាំនេះ និងឆ្នាំមុន បើអាចរក)។
2. កំណត់ Min/Max ដូចគ្នាដោយដៃលើទាំងពីរ (មិនប្រើ stretch ស្វ័យប្រវត្តិ)។
3. ពន្យល់ថាហេតុអ្វីជំហាននេះចាំបាច់សម្រាប់ការប្រៀបធៀបត្រឹមត្រូវ។

សកម្មភាពទី៤៖ ផ្ទាំងប្រៀបធៀប · ២០ នាទី

1. បង្កើត Print Layout ជាមួយក្រឡាចត្រង្គ ២ × ២ ឬ ២ × ៣ បង្ហាញបន្សំផ្សេងៗលើតំបន់ដូចគ្នា។
2. បន្ថែមចំណងជើងរងសម្រាប់ផែនទីនីមួយៗ (ឈ្មោះបន្សំ)។
3. បន្ថែមកំណត់សម្គាល់ពន្យល់ន័យបន្សំ NIR (ក្រហមភ្លឺ = រុក្ខជាតិ)។

សកម្មភាពទី៥៖ ការសន្និដ្ឋាន · ១០ នាទី

សរសេរ ៤ ប្រយោគ៖ បន្សំណាបង្ហាញព័ត៌មានច្រើនបំផុតសម្រាប់តំបន់របស់អ្នក ជាក់លាក់ និងហេតុអ្វី។

សកម្មភាពបន្ថែម៖ ការបកស្រាយដោយភ្នែក · ២០ នាទី

លើរូបភាព Landsat 8 ភ្នំពេញ (ពណ៌ពិត និងពណ៌សន្មត) ជ្រើសវត្ថុ ៥ ហើយបំពេញតារាងដោយប្រើធាតុនៃការបកស្រាយ (មេរៀនទី៩)៖

វត្ថុ	ពណ៌/ភាពភ្លឺ	ទំហំ	រូបរាង	វាយនភាព	លំនាំ	ទីតាំង/ទំនាក់ទំនង	ការសន្និដ្ឋាន
ឧ. ចំណុចប្រសព្វទន្លេចតុមុខ	ខៀវបៃតងល្អក់	ធំ	កោង	រលោង	—	ជួបគ្នាទន្លេបួន	ទឹក (ទន្លេ)

ផ្ទៀងផ្ទាត់ការសន្និដ្ឋានរបស់អ្នកជាមួយផែនទីមូលដ្ឋាន OpenStreetMap ឬ Google Satellite។

លទ្ធផលដែលរំពឹងទុក

ប្រៀបធៀបលទ្ធផលរបស់អ្នកជាមួយរូបខាងក្រោម ដែលបង្កើតពីទិន្នន័យវគ្គ (Landsat 8 ភ្នំពេញ ឬ Sentinel-2 ក្រុងព្រះសីហនុ)។ លទ្ធផលរបស់អ្នកមិនចាំបាច់ដូចបេះបិទទេ ប៉ុន្តែលំនាំគួរតែស្រដៀងគ្នា។

លទ្ធផលគំរូ ១៖ ជ្រើសបន្សំតាមសំណួរ។

អ្វីដែលត្រូវពិនិត្យ

• B5-B4-B3៖ សុខភាពរុក្ខជាតិ (ក្រហមដិត = ព្រៃ)។
• B7-B6-B4៖ សំណង់ និងដីទទេ លេចធ្លោ ពណ៌ស្វាយ-ផ្កាឈូក។
• B5-B6-B2៖ ដំណាំ (បៃតងភ្លឺ) ធៀបនឹងព្រៃ (បៃតងចាស់)។

លទ្ធផលគំរូ ២៖ ប្រៀបធៀបវិធី Stretch។

អ្វីដែលត្រូវពិនិត្យ

• គ្មាន stretch៖ ងងឹត ព្រោះតម្លៃប្រមូលផ្ដុំ ០,០៥–០,២។
• Min–Max រងឥទ្ធិពលពីក្រឡាខុសប្រក្រតី (ពពក ដំបូលភ្លឺ)។
• ២–៩៨% ជាជម្រើសលំនាំដើមល្អបំផុតសម្រាប់ការមើល។

កំហុសទូទៅ និងដំណោះស្រាយ

បញ្ហាដែលឃើញ	មូលហេតុទូទៅ	ដំណោះស្រាយ
ពណ៌ខុសពីរូបក្នុងមេរៀន	Stretch ខុសគ្នា	Cumulative count cut ២–៩៨%
ស្រទាប់ពីរពណ៌ខុសគ្នា	Stretch តាមការមើល (extent)	កំណត់ Min/Max ដូចគ្នាដោយដៃ
Pan-sharpening មានពណ៌ខូច	ក្រុមរលកមិនត្រួតគ្នា	ពិនិត្យការត្រួតគ្នា និង CRS
ផ្ទាំងប្រៀបធៀបមិនមានចំណងជើង	ភ្លេចដាក់បន្សំក្រុមរលក	សរសេរ B5-B4-B3 លើរូបនីមួយៗ

លទ្ធផលត្រូវប្រគល់

• ឯកសារ .qml ប្រាំសម្រាប់បន្សំនីមួយៗ។
• រូបថតអេក្រង់ប្រៀបធៀបវិធី stretch បួន។
• ផ្ទាំងប្រៀបធៀបបន្សំ (Print Layout PDF)។

ពិនិត្យលទ្ធផលដោយខ្លួនឯង

អាចវាយលេខខ្មែរ ឬលេខអារ៉ាប់។

១. ភាគរយកាត់ដែលណែនាំសម្រាប់ Cumulative Count Cut?

២. ក្រុមរលកណាដាក់ក្នុងឆានែលក្រហម សម្រាប់បន្សំពណ៌សន្មត NIR?

៣. ប្រភេទឯកសាររចនាប័ទ្មរបស់ QGIS?

៤. បន្សំណាសមស្របសម្រាប់ជម្រៅទឹករាក់?

៥. តើត្រូវកំណត់ Min/Max ស្វ័យប្រវត្តិ ឬដោយដៃ ពេលប្រៀបធៀបរូបភាពពីរកាលបរិច្ឆេទ?