លំហាត់ទី២៖ ប្រៀបធៀបគំរូវ៉ិចទ័រ និងរ៉ាស្ទ័រ

ព័ត៌មានលំហាត់

មេរៀនពាក់ព័ន្ធ៖ មេរៀនទី២៖ គំរូទិន្នន័យវ៉ិចទ័រ និងរ៉ាស្ទ័រ ការអនុវត្តដោយខ្លួនឯង · QGIS 3.34 LTR

គោលបំណង

• ពិនិត្យធរណីមាត្រ និងតារាងគុណលក្ខណៈរបស់ស្រទាប់វ៉ិចទ័រ។
• រកកំហុសធរណីមាត្រ និងកែវា។
• ពិនិត្យរចនាសម្ព័ន្ធ និងគុណភាពបង្ហាញរបស់រ៉ាស្ទ័រ។
• ប្រៀបធៀបផ្ទៃដែលគណនាបានពីទាំងពីរ រួចពន្យល់ភាពខុសគ្នា។

ឯកសារដែលប្រើ

ស្រទាប់	ប្រភេទ	ខ្លឹមសារ
parcels	វ៉ិចទ័រ ពហុកោណ	ក្បាលដីស្រែសន្មត ១២
parcels_errors	វ៉ិចទ័រ ពហុកោណ	ដូចខាងលើ តែមានកំហុសបញ្ចូលដោយចេតនា
roads	វ៉ិចទ័រ បន្ទាត់	បណ្ដាញផ្លូវសន្មត មានលើសចុង និងខ្វះចុង
landuse_10m	រ៉ាស្ទ័រ	ផែនទីប្រើប្រាស់ដីសន្មត ១០ ម៉ែត្រ

ផ្ដើម៖ ជ្រើសរើសគំរូទិន្នន័យ · ៥ នាទី

វត្ថុដូចគ្នាអាចតំណាងបានច្រើនរបៀប អាស្រ័យលើមាត្រដ្ឋាន និងគោលបំណង។ សាកល្បងផ្គូផ្គងខាងក្រោម រួចពិភាក្សាថា៖ នៅមាត្រដ្ឋានភូមិ តើមណ្ឌលសុខភាពគួរនៅតែជាចំណុចឬទេ?

សកម្មភាពទី១៖ ពិនិត្យធរណីមាត្រវ៉ិចទ័រ · ១៥ នាទី

1. បន្ថែមស្រទាប់ parcels ហើយបើក Attribute Table។
2. បើក Field Calculator រួចបង្កើតវាលថ្មី area_m2 ជាប្រភេទ Decimal៖ $area
3. កត់ត្រាផ្ទៃរបស់ក្បាលដីដែលមានលេខសម្គាល់ P01។
4. ប្ដូរ CRS បង្ហាញទៅ EPSG:4326 រួចគណនា $area ម្ដងទៀតក្នុងវាលថ្មី។

សំណួរ៖ តើតម្លៃទាំងពីរខុសគ្នាដែរឬទេ? ហេតុអ្វី? តើមួយណាអាចប្រើសម្រាប់រាយការណ៍ជាហិកតា?

អន្ទាក់ធម្មតាបំផុត

$area គណនាក្នុងឯកតារបស់ CRS។ ក្នុង EPSG:4326 ឯកតាជា អង្សា មិនមែនម៉ែត្រទេ។ លទ្ធផលនឹងជាលេខតូចឥតន័យ។ ត្រូវប្រើ CRS ព្យាករដូចជា EPSG:32648។

សកម្មភាពទី២៖ រក និងកែកំហុសធរណីមាត្រ · ២០ នាទី

1. បន្ថែម parcels_errors និង roads។
2. រត់ Vector → Geometry Tools → Check Validity លើ parcels_errors។
3. កត់ត្រាចំនួន និងប្រភេទកំហុសដែលរកឃើញ។
4. រត់ Processing → Fix Geometries រួចប្រៀបធៀបផ្ទៃសរុបមុន និងក្រោយ។
5. ពង្រីកមើលចំណុចប្រសព្វផ្លូវ រកលើសចុង និងខ្វះចុងដោយភ្នែក។

សំណួរ៖ តើផ្ទៃសរុបប្រែប្រួលប៉ុន្មានភាគរយក្រោយការកែ? តើកំហុសខ្វះចុងនឹងប៉ះពាល់ដល់ការវិភាគផ្លូវយ៉ាងដូចម្ដេច?

សកម្មភាពទី៣៖ ពិនិត្យរ៉ាស្ទ័រ · ១៥ នាទី

1. បន្ថែម landuse_10m ហើយបើក Properties → Information។
2. កត់ត្រា៖ ទំហំក្រឡា · ចំនួនជួរដេក និងជួរឈរ · CRS · តម្លៃ NoData។
3. ប្រើឧបករណ៍ Identify ចុចលើក្រឡាមួយចំនួន រួចកត់ត្រាតម្លៃ។
4. ពង្រីករហូតឃើញក្រឡាដាច់ៗពីគ្នា រួចសង្កេតព្រំដែនជាជណ្ដើរ។

សំណួរ៖ តើក្រឡាមួយគ្របផ្ទៃប៉ុន្មានម៉ែត្រការ៉េ? តើផ្លូវទទឹង ៦ ម៉ែត្រមើលឃើញទេ? ហេតុអ្វី?

ពិសោធន៍អន្តរកម្ម៖ បម្លែងវ៉ិចទ័រទៅជារ៉ាស្ទ័រ · ១៥ នាទី

ពហុកោណពណ៌ទឹកក្រូចខាងក្រោម គឺជាផ្ទៃទឹកពិតប្រាកដមួយនៅខេត្តកំពង់ឆ្នាំង (ពីស្រទាប់ Kh_Waterbody ផ្ទៃ ៧៤,៣ ហិកតា)។ ក្រឡាពណ៌ខៀវ គឺរ៉ាស្ទ័រដែលបង្កើតចេញពីពហុកោណនោះ។

• រំកិល ទំហំក្រឡា ពី ១០ ម ដល់ ២០០ ម។
• ប្ដូរ ក្បួន រវាង «ចំណុចកណ្ដាលក្រឡានៅក្នុងពហុកោណ» និង «ក្រឡាប៉ះពហុកោណ»។
• សង្កេតផ្ទៃរ៉ាស្ទ័រ និងភាគរយខុសគ្នា។

បំពេញតារាងនេះ៖

ទំហំក្រឡា	ក្បួនចំណុចកណ្ដាល (%)	ក្បួនប៉ះ (%)
១០ ម
៣០ ម
១០០ ម

សំណួរ៖ ហេតុអ្វីក្បួនប៉ះ ផ្ដល់ផ្ទៃធំជាងពិតជានិច្ច? · ហេតុអ្វីក្បួនចំណុចកណ្ដាលនៅតែជិតផ្ទៃពិត ទោះក្រឡាធំ? (ជំនួយ៖ ក្រឡាដែលបាត់ និងក្រឡាដែលលើស) · ប្រសិនបើវត្ថុជាស្ទឹងវែងស្ដើងទទឹង ២០ ម តើក្បួនចំណុចកណ្ដាលជាមួយក្រឡា ៣០ ម នឹងមានបញ្ហាអ្វី?

ពិនិត្យ៖ ជាមួយក្រឡា ៥០ ម និងក្បួនប៉ះ ផ្ទៃរ៉ាស្ទ័រធំជាងផ្ទៃវ៉ិចទ័រប៉ុន្មានភាគរយ?

សកម្មភាពទី៤៖ ប្រៀបធៀប និងសរសេរ · ១០ នាទី

1. រាប់ក្រឡាថ្នាក់ស្រែក្នុងតំបន់ក្បាលដី P01 (ប្រើ Identify ឬ Zonal Histogram)។
2. គុណនឹង ១០០ ម៉ែត្រការ៉េ ដើម្បីបានផ្ទៃប៉ាន់ស្មាន។
3. ប្រៀបធៀបនឹងផ្ទៃវ៉ិចទ័រពីសកម្មភាពទី១។
4. សរសេរ ៤ ទៅ ៦ ប្រយោគ៖ តួលេខទាំងពីរ · ភាពខុសគ្នាជាភាគរយ · មូលហេតុ · មួយណាដែលអ្នកនឹងរាយការណ៍ និងហេតុអ្វី។

លទ្ធផលត្រូវប្រគល់

• គម្រោង QGIS រក្សាទុកជា lesson-02.qgz។
• តារាងប្រៀបធៀបផ្ទៃវ៉ិចទ័រ និងរ៉ាស្ទ័រ។
• បញ្ជីកំហុសធរណីមាត្រដែលរកឃើញ និងលទ្ធផលក្រោយការកែ។
• សេចក្ដីសន្និដ្ឋានខ្លី។

ជម្រើសសម្រាប់ថ្នាក់គ្មានកុំព្យូទ័រ

ផ្ដល់រូបទី២.៤ និងរូបទី២.៥ ជាក្រដាសក្រឡាចត្រង្គ។ ឱ្យនិស្សិតគូសពហុកោណមួយលើក្រឡាចត្រង្គ រួចរាប់ក្រឡាដោយដៃតាមក្បួនពីរ៖ (ក) រាប់ក្រឡាដែលមានចំណុចកណ្ដាលក្នុងពហុកោណ (ខ) រាប់ក្រឡាដែលប៉ះពហុកោណ។ ប្រៀបធៀបលទ្ធផលទាំងពីរ។ នេះបង្ហាញឥទ្ធិពលក្បួនចាត់ថ្នាក់ដោយគ្មានកុំព្យូទ័រ។

---