លំហាត់ទី៦៖ ពីតារាង Excel ទៅជាផែនទី និងទម្រង់ប្រមូលទិន្នន័យ

ព័ត៌មានលំហាត់

មេរៀនពាក់ព័ន្ធ៖ មេរៀនទី៦៖ ប្រភព និងការប្រមូលទិន្នន័យ ការអនុវត្តដោយខ្លួនឯង · QGIS 3.34 LTR · ប្រហែល ៩០ នាទី

ស្ថានភាព

មន្ត្រីអប់រំម្នាក់ផ្ញើតារាងសាលារៀនដែលមានកូអរដោនេ រយៈទទឹង រយៈបណ្ដោយ ពីទូរស័ព្ទ។ អ្នកត្រូវនាំតារាងនោះចូល QGIS បម្លែង CRS ឱ្យត្រូវនឹងទិន្នន័យវគ្គសិក្សា ហើយរៀបចំទម្រង់សម្រាប់ប្រមូលទិន្នន័យថ្មីនៅទីវាល។

គោលបំណង

• នាំចូលតារាង CSV ដែលមានកូអរដោនេ (Delimited Text)។
• បែងចែក CRS ភូមិសាស្ត្រ (EPSG:4326) និង CRS ចំណោល (EPSG:32648) ហើយបម្លែងស្រទាប់។
• រៀបចំ GeoPackage និងទម្រង់បញ្ចូលទិន្នន័យ (Attributes Form)។
• វាយតម្លៃប្រភពទិន្នន័យ៖ អ្នកផលិត ឆ្នាំ ភាពត្រឹមត្រូវ អាជ្ញាបណ្ណ។

ឯកសារដែលប្រើ

ប្រើសំណុំទិន្នន័យ Cambodia (ឧបសម្ព័ន្ធ ខ)។ ស្រទាប់ទាំងអស់ប្រើ EPSG:32648។

ស្រទាប់	ថត	ខ្លឹមសារ
Kh_School	School/	សាលារៀន (ប្រើបង្កើតតារាង CSV គំរូ)
Kh_Province_Boundary	Admin/	ព្រំខេត្ត

ពិសោធន៍មុនចាប់ផ្ដើម · ១០ នាទី

សកម្មភាពទី១៖ បង្កើតតារាង CSV ដូចពីទូរស័ព្ទ · ១៥ នាទី

ដើម្បីក្លែងធ្វើតារាងពីទីវាល យើងនាំសាលាខេត្តកំពង់ឆ្នាំងចេញជា CSV ដែលមានរយៈទទឹង រយៈបណ្ដោយ។

1. ជ្រើស Kh_School ដោយ "PROVINCE" = 'Kampong Chhnang' AND "SCHOOL_TYP" = 'Lycee G7-12'

2. ចុចស្ដាំ → Export → Save Selected Features As៖

   ប៉ារ៉ាម៉ែត្រ	តម្លៃ
   Format	Comma Separated Value [CSV]
   File name	kc_lycee.csv
   CRS	EPSG:4326 - WGS 84
   Layer Options → GEOMETRY	AS_XY

3. បើក kc_lycee.csv ក្នុង Notepad។ វាលថ្មី X និង Y ជា ដឺក្រេ។ តើមួយណាជារយៈបណ្ដោយ (longitude)?

សកម្មភាពទី២៖ នាំចូល CSV និងបម្លែង CRS · ២០ នាទី

1. Layer → Add Layer → Add Delimited Text Layer៖ File kc_lycee.csv · Point coordinates · X field X · Y field Y · Geometry CRS EPSG:4326។
2. ពិនិត្យថាចំណុចធ្លាក់ត្រូវទីតាំងលើផែនទី។ បើចំណុចធ្លាក់ក្នុងសមុទ្រនៅអាហ្វ្រិក ជាធម្មតាអ្នកប្ដូរ X និង Y ឬកំណត់ CRS ខុស។
3. Vector → Data Management Tools → Reproject Layer៖ Target CRS EPSG:32648 → kc_lycee_utm.gpkg
4. បើក Field Calculator លើ kc_lycee_utm បង្កើតវាល E = $x និង N = $y។ ប្រៀបធៀបកូអរដោនេពីរប្រព័ន្ធ។

កុំប្ដូរ CRS ដោយ Set CRS

Set Layer CRS គ្រាន់តែប្ដូរស្លាក CRS ដោយមិនគណនាកូអរដោនេឡើងវិញ។ ដើម្បីបម្លែងពិតប្រាកដ ត្រូវប្រើ Reproject Layer ឬ Export ជាមួយ CRS ថ្មី។ ទ្រឹស្ដី CRS យោងទៅសៀវភៅទី១។

សំណួរ៖ ហេតុអ្វីមិនអាចវាស់ចម្ងាយជាម៉ែត្រដោយផ្ទាល់លើស្រទាប់ EPSG:4326?

សកម្មភាពទី៣៖ រៀបចំទម្រង់ប្រមូលទិន្នន័យ · ២៥ នាទី

1. Layer → Create Layer → New GeoPackage Layer៖ File field_survey.gpkg · Layer wells · Geometry Point · CRS EPSG:32648

2. បន្ថែមវាល៖

   វាល	ប្រភេទ	គោលបំណង
   well_type	Text	ប្រភេទអណ្ដូង
   depth_m	Decimal	ជម្រៅ (ម)
   working	Boolean	ដំណើរការឬទេ
   survey_date	Date	ថ្ងៃស្ទង់
   surveyor	Text	អ្នកស្ទង់

3. Layer Properties → Attributes Form៖

   • well_type → Widget Value Map៖ អណ្ដូងស្នប់ · អណ្ដូងជីក · អណ្ដូងស្នប់អគ្គិសនី
   • depth_m → Range ពី ០ ដល់ ២០០
   • survey_date → Default value now()
   • well_type → Constraints → Not null
4. បើក Toggle editing ហើយបន្ថែមចំណុចសាកល្បង ៣ ដោយចុចលើផែនទី។ សាកល្បងបញ្ចូលជម្រៅ ៥០០ ហើយសង្កេតថាទម្រង់បដិសេធ។

ពីកុំព្យូទ័រទៅទូរស័ព្ទ

គម្រោងនេះអាចបើកក្នុងកម្មវិធី QField (ឥតគិតថ្លៃ) លើទូរស័ព្ទ Android ដើម្បីប្រមូលទិន្នន័យដោយប្រើ GPS ពិតប្រាកដ។ ទម្រង់ដែលអ្នករៀបចំនៅទីនេះ នឹងបង្ហាញដូចគ្នានៅលើទូរស័ព្ទ។

សកម្មភាពទី៤៖ វាយតម្លៃប្រភពទិន្នន័យ · ២០ នាទី

ប្រើ ឧបសម្ព័ន្ធ ខ បំពេញតារាងសម្រាប់ស្រទាប់បីនៃការជ្រើសរើសរបស់អ្នក៖

ស្រទាប់	អ្នកផលិត	ឆ្នាំ	បឋម/បន្ទាប់បន្សំ	មាត្រដ្ឋាន/ភាពត្រឹមត្រូវ	អាជ្ញាបណ្ណ	ស័ក្ដិសមសម្រាប់អ្វី

លទ្ធផលត្រូវប្រគល់

• kc_lycee.csv និង kc_lycee_utm.gpkg ជាមួយវាល E N។
• field_survey.gpkg ជាមួយទម្រង់ និងចំណុចសាកល្បង ៣។
• តារាងវាយតម្លៃប្រភពទិន្នន័យ។

ពិនិត្យលទ្ធផលដោយខ្លួនឯង

អាចវាយលេខខ្មែរ ឬលេខអារ៉ាប់ ហើយមិនចាំបាច់ដាក់សញ្ញាក្បៀស។ ផ្នែកនេះសម្រាប់ពិនិត្យខ្លួនឯងប៉ុណ្ណោះ។

១. តារាង kc_lycee.csv មានប៉ុន្មានជួរ (មិនរាប់ចំណងជើង)?

២. សាលា Baribo Tbaung មានរយៈទទឹង (Y) ប៉ុន្មាន? (ទសភាគ ៣ ខ្ទង់)

៣. សាលាដដែល មាន Easting (E) ក្នុង EPSG:32648 ប្រហែលប៉ុន្មានម៉ែត្រ?